जीएसएस महाविद्यालयाच्या मैदानावर ‘सक्सेरियन्स २४- रीकनेक्ट अँड रीजॉईस’ हा पुनर्मिलन महामेळावा
बेलगाम प्राईड /जीएसएस महाविद्यालयाला नुकताच स्वायत्त (ऑटोनॉमस) दर्जा प्राप्त झाला असून व्यवस्थापन, कर्मचारी व विद्यार्थ्यांसाठी ही गौरवाची बाब आहे. याबाबतची माहिती माजी विद्यार्थ्यांना व्हावी यासाठी महाविद्यालयाच्या माजी विद्यार्थी संघटनेतर्फे २८ डिसेंबर रोजी महाविद्यालयाच्या मैदानावर ‘सक्सेरियन्स २४- रीकनेक्ट अँड रीजॉईस’ हा पुनर्मिलन महामेळावा आयोजित केला आहे, अशी माहिती प्राचार्य अरविंद हलगेकर यांनी दिली. ते सोमवारी (दि. २५) रानडे सभागृहात आयोजित पत्रकार परिषदेत बोलत होते.
ते पुढे म्हणाले, महाविद्यालयाला स्वायत्त दर्जा मिळणे ही अभिमानास्पद बाब असून सर्वांसाठी आनंदाचा क्षण आहे. या आनंदात सहभागी होण्याबरोबरच जुन्या मित्र मैत्रिणींना महाविद्यालयाच्या आवारात पुन्हा भेटता यावे यासाठी महामेळाव्याचे प्रयोजन केले आहे. या महामेळाव्यात महाविद्यालयाच्या पहिल्या बॅचपासून यंदाच्या बॅचपर्यंतचे माजी विद्यार्थी सहभागी होणार आहेत. त्यासाठी माजी विद्यार्थी संघटनेने महामेळावा समिती स्थापन केली असून त्याद्वारे सर्व नियोजन केले जात. विविध माध्यमातून अधिकाधिक विद्यार्थ्यांपर्यंत पोचण्याचा प्रयत्न केला जात आहे. एखाद्या महाविद्यालयाने सर्व माजी विद्यार्थ्यांना एकाचवेळी एकत्र आणण्याची ही पहिलीच वेळ असावी, असे त्यांनी सांगितले.
माजी विद्यार्थी संघटनेचे अध्यक्ष प्रा.भरत तोपिनकट्टी म्हणाले, महामेळावा २८ डिसेंबर रोजी शनिवारी सकाळी १० ते ५ या वेळेत होणार असून भरगच्च कार्यक्रमांचे आयोजन केले आहे. सकाळी १० ते ११ यावेळेत नोंदणी करता येईल. सकाळी ११ ते १२ या वेळेत उद्धाटन सोहळा होणार आहे. यावेळी माजी प्राचार्य व प्राध्यापकांचा सन्मान केला जाणार आहे. दुपारी १२ ते २.३० पर्यंत माजी विद्यार्थ्यांना पुनर्मिलनाचा आनंद घेता येणार आहे. त्यासाठी बॅचनिहाय वर्गखोल्या उपलब्ध करुन दिल्या जाणार असून माजी विद्यार्थ्यांना जुन्या आठवणींना उजाळा देण्याची संधी मिळेल. दुपारी २.३० ते ३.३० या वेळेत स्नेहभोजनाचा कार्यक्रम होईल. तसेच समुह छायाचित्र काढले जाईल.दुपारी ३.३० नंतर सांस्कृतिक कार्यक्रम होणार असून माजी विद्यार्थ्यांना आपल्या कलागुणांना वाव देता येईल. गॅदरिंगच्या धर्तीवर हा कार्यक्रम होणार आहे, अशी माहिती त्यांनी दिली.
महामेळावा समितीचे प्रमुख कुलदीप हंगिरगेकर म्हणाले, सर्व माजी विद्यार्थ्यांना एकाचवेळी एकत्र येण्याची संधी मिळाली आहे. हा सोहळा अविस्मरणीय व्हावा यासाठी आमचे प्रयत्न सुरु आहेत. त्यासाठी विविध समित्या स्थापून जबाबदाऱ्यांचे वाटप केले आहे. महामेळाव्याला हजारहून अधिक माजी विद्यार्थी सहभागी होणार आहेत. आतापर्यंत शेकडो जणांनी ऑनलाईन पद्धतीने नोंदणी केली असून हा ओघ सुरुच आहे, असे त्यांनी सांगितले. यावेळी प्रभारी प्राचार्य अभय सामंत, माजी विद्यार्थी संघटनेचे सचिव प्रा. संदीप देशपांडे, महामेळावा समितीचे सचिव प्रा. अनिल खांडेकर, ॲड. समीना बेग यांच्यासह प्रमुख पदाधिकारी उपस्थित होते.
